Independentistak sarea asteartean aurkeztuko da Bilbon

Independentistak sareak kolore berdea hautatu du bere irudi korporatiborako, eta zortzi puntako izarra, Estatu propioa izatea lortu duten nazioen ikurra eta “askatasunaren eta independentziaren ikurra munduan”, Txutxi Ariznabarretak goizean Arriagan azaldu duenez. Datorren asteartean aurkeztuko da Bilbon San Frantziskoko auzo etxean arratsaldeko 7etan egingo den ekitaldian.

Berdea itxaropena eta ilusioaren kolorea delako aukeratu dute; zortzi puntako izarrari dagokionez, berriz, Euskal Herriaren sinbologiarekin lotu dute. Hala, euskal tradizioan hainbat tokitan izar baskoia deitu diotena ageri da eta, bestetik, ikurrinak ere bi gurutzeekin zortzi punta egiten ditu, baita Nafarroako banderak ere. Euskal kulturan zeresan handia duen eguzkilorea ere aipatu du Ariznabarretak.
Bilbon egin duten agerraldian esan duenez, Independentistak sarea otsailean abiatu zenetik hainbat urrats egin dituzte eta orain sarea sortzeko lanean ari dira, aurkezpen eztabaidak antolatuz.
Eztabaida prozesua uda osoan zabaltzeko asmoa dute batzarren bidez baina, eztabaidez gain, kalean ere independentziaren aldeko urratsak ikusi behar direla uste dute eta horretarako uda parteko jaietan mobilizazio eta ekimenak antolatuko dituzte. “Uda berde bat antolatzea planteatzen dugu, egun berde bat independentziaren alde. Denak berdez jantzita kalejiran, bazkarian edo bandera berdeak eramaten. Olatu berde bat antolatu nahi dugu”, azaldu du Txutxi Ariznabarretak.
Horrek guztiak azaroan egingo duten asanblada nazionala izango du jomuga baina, horren aurretik, urriaren 12an beste ekimen bat antolatuko dute Simon Bolibarren figuraren inguruan, 200 urte betetzen baitira Ameriketako herriek beren independentzia prozesuak hasi zituztenetik.